المنطقة الحرة

15 صفة لو لقيتيها في راجل.. اتجوزيه

funny-groom

-لو ساب ماتش بلاي ستيشن مع أصحابه عشان يخرج معاكي، وما فضلش طول الوقت مادد بوزه شبرين، ومحسّسك إنك مدام سيمبسون اللي الملك إدوارد التامن اتخلى عن عرش إنجلترا عشانها، اتجوّزيه.

-لو قدر يتخلّى عن حبّه للبصل، وما هوّبش ناحيته وهو نازل يقابلك، اتجوّزيه.

-لو عرف اسم أي لون تاني غير الأحمر والأصفر والأزرق والأسود والأبيض، اتجوّزيه.

-لو عرف يفرّق بين الشبت والكسبره، اتجوّزيه.

-لو كنتوا خارجين، وقلتي له “نص ساعة وأكون جاهزة”، وصدّقك، اتجوّزيه.

-لو اتعزم عندكم في البيت، وصدق إن إنتي اللي طابخة البيكاتا بالشامبنيون، والكانيلوني بالرِد صوص، أو عرف ينطق أسماءهم مرة تانية، اتجوّزيه.

-لو اختلفتم سوا، وأول ما تعيطي بيقتنع إن هو اللي غلطان، ويصالحك، اتجوّزيه.

-لو بيعبّر لك عن حبّه بكباب الحلّة ولحمة الراس والمخ والفشّة والممبار والعكاوي، اتجوّزيه.

-لو بيغسل وشّه، كل كام يوم، وبيسرّح ساعات، ويعرف يلبس الشراب صح، وبيشيل علبة مناديل في جيبه الورّاني، وما بيوقعش على نفسه وهو بياكل، اتجوّزيه.

-لو استحمل يلف معاكي وإنتي بتعملي شوبنج، وما طلقكيش خمس ست مرات، قبل ما يتجوّزك أصلا، اتجوّزيه.

-لو سابك تقلبّي في موبايله عشر دقايق بس، من غير ما يحاول يشتت انتباهك، ويكلّمك عن كل الاختراعات والأفلام والثورات والحبشتكانات اللي في الدنيا، اتجوّزيه.

-لو قالك إنه هيكلمك بعد ما يخلّص شغل، أو قعدة القهوة، أو ماتش الكورة، وافتكر يكلّمك فعلا، اتجوّزيه.

-لو بيكلّمك بنفس الشغف اللي بيكلّم بيه صحاب القهوة، وسنسن بنت طنط اعتماد، ولولو جارة بنت خالته، وباكينام وسارة ولوسي وديدا وجنة وبيبة، اتجوّزيه.

-لو بيستحمل رغيك بالساعات في موضوع هو مش فاهم فيه أي حاجة، ولا هيفهم مستقبلا، اتجوّزيه.

-لو افتكر عيد ميلادك مرتين وراء بعض، اتجوّزيه.

لو…

اقرأ أيضًا:

15 صفة لو لقيتها في بنت اتجوزها

Capture

Comments

التعليقات

أظهر المزيد

مقالات مرتبطة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى